Gå til sidens hovedinnhold

Her skal dei skape julestemning: — Det blir ei sjeldan oppleving

I år har Tyssedalkoret tenkt annleis når dei planlegg julekonsert. Dei ber derfor publikum kle godt på seg, og komme på konsert under Skalltaket 12. desember.

For abonnentar

Å vere konsertarrangør i koronatida er ikkje enkelt, og smittevernreglane set grenser for både publikumstal og kva som er fysisk mogleg å gjennomføre.

— Eg trur alle prøver å tenke litt nytt no. Arrangørane vil gjere ting annleis, for å sørge for at det skjer noko i lokalsamfunnet, seier leiar i Tyssedalkoret, Turid Angell.

For dei har valet falt på Skalltaket som konsertarena. Kanskje eit litt utradisjonelt val i desember, men koret har ein plan på korleis dei skal få det til å bli ein stemningsfull konsert som folk vil hugse i lang tid.

— I år tenkte vi å gjere det på ein ny måte. Vi kjem alltid til å følge våre eigne tradisjonar, men dette følte vi var året for å utfordre oss sjølv. Så vi håpar folk har lyst til å oppleve god, gamaldags julestemning på ein ny måte, seier dirigent Eldbjørg Furholt.

Ifølge Angell tente kormedlemmene på ideen umiddelbart.

— Stillongssalet har allereie begynt å gå unna, seier ho lattermildt.

Tenker på smittevern

Publikum må og kle godt på seg til konserten, og så skal koret gjere det dei kan for å skape ly, avgrense arealet, og dei vil ha på plass bålpanner og julebelysning under Skalltaket. Sjølve konserten vil vare ein dryg time. Alle smittevernreglar blir følgde, og planane er godkjende av kommuneoverlegen. Det blir fastsette sitteplassar.

— Vi er optimistiske, og håpar å selje mellom 200 og 300 billettar, seier Furholt og Angell.

Maksimal publikumsgrense for offentlege arrangement utandørs er tre grupper på 200, altså totalt 600 personar. På grunn av smittevernreglar er det viktig at alt av billettsal går gjennom Odda bibliotek eller ebillett.no.

— Skulle det skje noko uføresett så er ein garantert å få pengane tilbake, konstaterer dei.

Med seg som arrangør har dei Blueslaget lokst utøve, og både «Badnalaget» i Skare ungdomslag og Sal og scene frå Odda ungdomsskule er med på konserten. Dei får og inn eit lydfirma til å hjelpe med lyd.

— Det blir ei familieframsyning, og det er veldig kjekt å få med litt yngre krefter. Dei sa ja med ein gong, og har vore veldig positive.

— Vi planlegg og å aktivisere publikum litt, smiler Furholt.

Ho legg til at det einaste dei ikkje kan kontrollere er vêret, men at det er svært få dagar i året ein ikkje kan opphalde seg under Skalltaket. Koret skal gjere det dei kan for å gjere det best mogleg. Ho trur at dette kan bli ei sjeldan og kuriøs oppleving, som folk kjem til å hugse.

— Det blir kanskje ei lita overrasking på billetten. Men det er ingen som blir kasta ut dersom dei har med seg ein termos med kaffi, seier Angell.

Ho meiner at folk treng noko positivt å sjå fram til før jul, i denne tida der det har vore mange nedslåande nyhende.

— Eg gler meg i alle fall veldig over at det er noko som skjer, seier ho.

Planar for neste år

Som alle andre har Tyssedalkoret måtte ta omsyn til smittevernreglar når dei har hatt øvingar det siste halve året. Angell fortel at dette har fungert bra, og at dei er glade for å kunne øve kvar veke som normalt.

— I tillegg er det kjekt å ha planar klare også for første halvdel av 2021. Det er viktig å ha noko å øve fram i mot, seier Furholt.

Dei strekar under at det er plass til fleire i koret, men at rekruttering er vanskeleg.

— For mange handlar det både om å ha ein sosial arena for seg sjølv, men og at ein ønsker å halde på tradisjonar og tilbod i lokalsamfunnet. Dersom ingen er med, vil det jo døy ut, påpeiker Furholt.

For Angell og mange andre er tysdagane eit høgdepunkt i veka der dei får øve saman med koret.

— Tysdagen er litt heilag. Det skal veldig mykje til for at eg droppar ei korøving, smiler ho.

Kommentarer til denne saken