Eivind Dahle Sjåstad er redaktør og dagleg leiar i Hardanger Folkeblad, og bur i Odda. Vi bad han om å sende eit gammalt bilde av seg sjølv, og fortelje korleis livet har endra seg sidan då. Dette er det han svarte:

Her er eg vel 22 år og eg reknar med dette er i 2007 då Brann tok seriegull. Då var det på med finstasen og Nystemten på anlegget.

Kva hugsar du best frå denne tida?

Då var eg student og eg hugsar eg jobba mykje både med skulen og som freelancejournalist og hadde i tillegg fleire andre strøjobbar. Men det var også mykje artig på fritida med fotballturar, snowboardkøyring og gode vener som fann på utruleg mykje morosamt. Eg studerte i Bergen, men nytta høve til å reisa å besøka dei eg kjende som studerte i utlandet. Med gratis overnatting og studentrabattar var det overraskande billeg. Det var ei fin tid, rett og slett. Dessverre har det berre gått nedover med Brann etter seriegullet.

Korleis har livet ditt endra seg sidan då?

Den største endringa er nok at eg no har familie, er gift og fått to flotte ungar. Som bergenspatriot var det og ei stor endring å utvandra frå «republikken» mellom dei sju fjell, men eg har ikkje angra eit sekund på det i ettertid.

Kva råd ville du gitt deg sjølv om du kunne gå tilbake i tid?

Sel den Toyotaen så fort den streikar første gang.