For å starta med produksjon av flaskevatn på Hovland er det samla kapitalbehovet på 185 millionar kroner. Eit vilkår for at driftsselskapet «Nordic Ice Water Company» AS (NIWC) etablerer verksemda si på Hovland, er at eit eigedomsselskap står som eigar av-, og legg til rette produskjonslokala og infrastrukturen i tilknyting til dette.

Ullensvang herad har saman med Røynstrand Eiendom AS skipa selskapet Hardanger Industripark AS, som skal inngå som eigedomsselskap i samband med etableringa av flaskevatnproduksjon.

NIWC skal stå for 100 millionar kroner i kapital, i tillegg til ein driftskapital på 30 millionar kroner, medan Hardanger Industripark kalkulerer med investeringar på 54,9 millionar kroner.

Ny infrastruktur

Det vert lagt opp til at Ullensvang herad og Hordaland fylkeskommune skal investera i ny infrastruktur på Hovland, kostnadsrekna til 16 millionar kroner. Det dreier seg då om investering i ny kai, veg, bru og trafikkareal på området.

Heradet har sendt søknad til fylkeskommunen med 50/50 fordeling mellom fylkeskommunen og heradet.

Søknaden skal fylkestinget ta stilling til i byrjinga av neste veke.

Ullensvang herad skal bidra med 8 millionar kroner, der 6 millionar vert låneopptak, medan 2 millionar vert finansiert gjennom unytta løyvingar frå næringsfondet.

Saka om finansiering av infrastruktur skal opp i formannskapet førstkomande måndag, med endeleg vedtak i heradsstyret den 19. juni.

Ved ein rask avklaring i heradet og i fylkestinget har NIWC høve til å få med seg delar av sesongen 2007.

Les meir i papirutgåva fredag 09.06