Med det har hovudstaden i Hardanger truleg fått det fyrste av fleire tilbod som skal atterreisa Odda som turiststad. Idyllisk plassert mellom høge fjell, to nasjonalparkar, Folgefonna og Buerbreen har dei entusiastane Anna Bjørkevoll, Jostein Soldal og brørne Bård og Tor Bye forvandla den tidlegare aldersheimen i Odda til ei turistperle.

Hektiske månader

Sjølv om marknadsføringa svikta litt i innspurten, hadde svært mange funne vegen til Vasstun laurdag ettermiddag, då Anna Bjørkevoll og Jostein Soldal orienterte både om dei sju hektiske månadene dei med god hjelp av alt frå lokale entreprenørar, dugnadsvillige medhjelparar, slekt og venner har skapt om som sidan 1927 har vore aldersheim i Odda.

Bygget var i si tid teikna av Olav Holm, medan arkitekt Gro Lavold har stått for forvandlinga. Møbelsnekker Siri Kaland har laga resepsjonsdisken, alle borda i kaffibaren «Rossnos» og restauranten «Flytand Bjørn»

Opphald og oppleving

Som namnet tilseier, skal opphald her kunna kombinerast med tradisjonsrik mat, guida turar og ulike opplevingar.

Vasstun har booking-avtalar heilt fram til 2009. Det er alt frå foreiningar, private arrangement, russetreff, bursdagar og verksemder. I juni skal gjestehuset servera gallamiddag til 120 personar.

Med opninga av Vasstun gjestehus får innbyggjarane i Odda også tilgang til ein moderne kafé som er open heile tida, året rundt. På sommarstid vert det uteservering på ein 60 kvadratmeter stor terasse av skiferheller.

Etableringa betyr også fem kjærkomne årsverk for lokalsamfunnet. Vasstun er også saman med 20 andre reiselivsaktørar frå Odda i prosjektet «Fossenes dal - ei reise verdt».

Etasjar med tema

Mellom måla er også å få cruisebåtturistane til å stoppa i Odda. Det vert også arbeidd med å få i gang pakketurar med hurtigbåt frå Bergen, og flyturistar frå London.

Kvar av dei tre etasjane på Vasstun skal dekorerast etter ulike tema. Første etasje skal omhandla natur, andre kultur. Eit av romma her heiter «Bikubesong», og skal ha både bøker og bilete om både forfattaren Frode Grytten og murboligen.

og informasjon om forfattaren. Tredje etasje skal femna om både kultur og natur.

Dugnadsånda lever

Ordførar Toralv Mikkelsen i Odda stod for den offisielle opninga, og kunne slå fast både at dugnadsånda lever og at framtida til Odda såg ljos ut, både med dette prosjektet, og med alt det andre som i turismens namn boblar opp i kommunen.

Han oppmoda særleg oddingane om å bruka det nye tilbodet, ikkje minst i skuldersesongane. Etter han var det flerie som gratulerte og takka. Og alle var samde med nabo, kollega og keramikar Tove Hidle at: - Nærare himmelen kan du ikkje koma enn her.