Bygginga av Hardangerbrua skal starta vinteren eller våren 2008. Ho skal stå ferdig i 2011.

Kostnadsramma 2.040 millionar kroner. Bompengar og lokale tilskot skal dekka det meste av kostnadene. I tillegg kan det nyttast opptil 180 millionar kroner i statsmidlar.

Bompengeperioden på Hardangerbrua er i utgangspunktet sett til 15 år. Men regjeringa ser det som aktuelt å forlengja bompengetida for å finansiera tunnelar på riksveg 7 over Hardangervidda. Dette skal vurderast nærare når ei utgreiing om trafikk og villrein er ferdig ein gong i 2006.

Regjeringa legg vekt på at Hardangerbrua vil gje eit betre lokalt samband i indre Hardanger. I tillegg vil brua gje eit betre tilbod for regionaltrafikken mellom Odda og Voss, mellom Bergen og Hardanger og vidare mot øvre Hallingdal.

Hardangerbrua er planlagt som tofelts hengebru med gang- og sykkelveg. Brua får eit hovudspenn på 1310 meter, som er 30 meter lengre enn den vidkjende Golden Gate-brua i San Francisco.

Brutårna vil raga 186 meter over fjorden. I tillegg skal det byggjast 2,4 kilometer vegtunnel og 0,8 kilometer veg. Det skal og byggjast 0,9 kilometer gang- og sykkelveg fram til brua.

Seglingshøgda vert 55 meter.

I fyrste omgang vil Statens vegvesen byggja opp ein prosjektorganisasjon som skal handtera byggjeplanlegging, kontraktsarbeid og byggjearbeid. Byggeplanlegginger omfattande og krev over eit års arbeid.

Prosjektet er elles så stort at både planlegginga og bygginga skal lysast ut på tilbodskonkurranse i heile EØS området.

Men fyrst må Stortinget gjera endeleg vedtak av prosjektet.