-Kan den norske stat seie nei til eit lokalt finansiert bruprosjekt? innleidde Sverre Kleivkås retorisk på folkemøtet i Eidfjordhallen.

-Nei, laut svaret frå paneldeltakarane på dette spørsmålet.

-Er partia på Stortinget på line med sine representantar i panelet måndag kveld, vert det soleklart fleirtal for brua, oppsummerte ordstyrar Frank Aarebrot etter innleiinga til panelet.

Venstre garanterte

-Eg lovar at me skal gjere alt som står i vår makt, ikkje berre til vedtak, men til positivt vedtak for Hardangerbrua før sommarferien, innleidde Petter Løvik, leiar for samferdslekomiteen på Stortinget, med til spontan jubel frå salen.

Hallelujastemninga var dermed sett frå fyrste stund. Arrangørane hadde ei målsetjing på 1000 frammøtte, noko dei godt og vel oppnådde. Dei frammøtte hardingane avbraut paneldeltakarane fleire gonger med spontant applaus og demonstrerte sin samla folkevilje.

Det fungerte tydeleg, dei tilreisande politikarane let seg overvelda over det massive frammøtet i Eidfjordhallen.

-Det er vanskeleg å ikkje ta innover seg den lokale folkeviljen, sa Terje Breivik og opna med å avlive ein myte om at Venstre er mot brua. Han kom med garanti frå samferdsleministeren om at regjeringa vil fremje saka før Stortinget tek sommarferie.

-Det gjer inntrykk å få høyre at eit tilsvarande oppmøte i Bergen ville telt ei folkemengd på 40 000, sa Anne Grethe Strøm Erichsen (Ap).

-Dette minner meir om eit vekkelsesmøte, sa Jan Sahl frå Krf.

Fråverande motstandarar

Berre Ragna Flotve frå SV stod einsam i panlet som brumotstandar.

-Det er ikkje berre brua som kan redde Hardanger. Ein har brukt tjue år på å sjå på hindringane, ein må sjå moglegheitene i Hardanger. Er verkeleg brua viktigare enn vegstandarden, spurde Flotve salen.

Arrangørane hadde også invitert Per Nordø og Kurt Oddekalv i Miljøvernforbundet som lenge har arbeidd mot brua, men dei fann ikkje tid til å stille opp.

-Det er ille når NHO er meir folkeleg enn miljørørsla, sa Frank Aarebrot til det manglande oppmøtet frå brumotstandarane.

-At Nordø og Oddekalv takka nei til å stille, tek me som eit teikn på resignasjon, seier Sverre Kleivkås til Hardanger Folkeblad.