Alt klaffa for 26 dugnadsarbeidarar, trimklasse og 32 konkurransedeltakarar då første løpet av Vøringsfossrace gjekk fredag 10. september. Overskya, høveleg temperatur og turr bakke la tilhøva godt til rette for motbakkefolket, som i år talde elleve fleire enn i fjor. I løpet av helga skal dei gjennom tre beinharde løp, det siste over to mil langt.

Det første løpet går frå Måbø gard, inn dalen eit lite stykke, deretter opp ein bråte med trappetrinn som heiter Måbøgaldane, før det flatar ut og løparane spring mot Fossli hotell som er mål. Løpet er nesten 6 km og løparane må leggje 500 høgdemeter bak seg på vegen. 3700 meter er sti og steintrapper.

19 sekund betre

I fjor vann Nils Magnus Bøen Grave på tida 00:35:25. Sjur Børsheim frå Ulvik slo denne med 19 sekund då han kom som første deltakar over målstreken på tida 00:35:06. Det var imponerande av karen som fortel til HF at han har trappa noko ned på idretten i det siste. Men hans 11. plass i Wasaloppet for eit par år sidan burde likevel fortelje oss kva nivå fleire av utøvarane som tok seg opp Måbødalen på fredag ligg på.

Førkjøla, men suveren

Det som var vel så imponerande var at May Britt Buer (Gular) kom i mål som nummer to på tida 38:02. Ho snudde ryggen til alle dei andre, og parkerte sin gamle rekord med to minutt. Det er sterkt gjort av motbakkemeisteren som faktisk var noko forkjøla denne kvelden.

Båe vinnarane fortel til HF at det var lett å løpe denne kvelden, og at det heilt klart var til gagn at løypa var turr og lett.

Dermed står Sjur Børsheim og May Britt Buer med leiartrøyer på laurdag føremiddag når løpet opp frå Simadal tek til. Det er eit løp på 14,5 km og 1180 høgdemeter.