- Det var Vilde som spurde meg om me skulle symja over fjorden, seier mamma Elin Sandstå Røynstrand, som sa «sjølvsagt».

Vilde S. Røynstrand 11 år og Ingvild Dvergsdal 12 år.

Jentene ringde til kompisane Aleksander Nakkerud og Haldor Espe, som sa ja til å bistå med fylgjebåt.

Symjeturen starta på Skjæret ved fruktlageret på Børve i totida sundag.

Lenger enn planlagt

Meininga var at dei skulle symja tvers over, for her er fjorden på det smalaste. Men dei hadde ikkje teke høgde, som det heiter, for utgåande straum.

Ein time og åtte minutter seinare nådde dei land på andre sida. Og var då komne heilt ut til ei bryggje/hytte nord for saftfabrikken på Aga.

Dermed vart symjeturen monaleg lenger enn planlagt. Etter HF sine, litt grove utrekningar, var den planlagde distansen på rundt 1,3 km, medan turen vart minst 2,5.

Sidestraum

Viss ein då også reknar med at han gjekk litt i boge, på grunn av sidestraumen, kan dei plussa på endå litt til.

Uansett var det ein prestasjon som det står respekt av, og jentene hadde fylgjeleg lov å vera litt skjelvne i beina rett etter landkjenning.

Etter båtskyss attende til Børve, fekk dei brus og

nysteikte bollar av foreldra til Ingvild. Dei var mektig imponerte og stolte av jentene, for dei hadde faktisk ikkje tru på at dei ville klara det.