18 pelar skal ned i grunnen før ein kan starta på betongarbeidet med kaien, om ei veke eller to. Det er og blitt frakta fyllmassar frå Fjellhallane på Boliden, i alt 3000 kubikk.

Røynstrand Entreprenør AS har jobben med å byggja infrastruktur, samt å renovera bygningsmassen på Hovland. Oppdragsgjevar er Hardanger Industripark AS (bygningsmassen) og Ullensvang herad (infrastruktur).

Arbeidsleiar Svein Johannes Røynstrand fortel at dei no byrjar å bli ferdige med rivingsarbeidet og fjerning av massar inne i bygningane.

- Vi byrjar snart med renovering av bygningar og å setja opp ein ny lagerbygning, seier Røynstrand.

Arbeidet med å renovera bygningane skal vera ferdig i løpet av hausten, men det er pårekna litt etterarbeid på nyåret.

Infrastrukturen skal vera ferdig i september.

- Brua nord for kaien er så godt som ferdig. Det er berre toppdekket som står att, fortel Røynstrand.

Entreprenørfirmaet har i alt 15 personar i arbeid på Hovland. Svein Johannes Røynstrand trur det vil verta fleire. I tillegg er det også underentreprenørar i sving.