Fyrste skuledag etter vinterferien samla barn og vaksne på Røldal skule seg til å feire 9. klassingen Gaute Kvåle, som vann gull under noregsmeisterskapen i langrenn for 15- og 15-åringar.

- Det at du vann Hovedlandsrennet og med det kan kalla deg noregsmeistar er noko me er svært stolte over, sa rektor Dag Sverre Ekkje i ei lita tale før kakespisinga.

Gaute fekk og blom, og lovnad om ein bunadskniv med inngravering, som ei gåve frå Odda kommune og frå skulen.

Rektor leste frå ei reiseskildring av Henrik Angell, som i 1884 kom til Røldal og var så imponert over kor flinke gamle og unge var til å stå på ski.

- Sett på bakgrunn av det Angell skreiv er det ikkje meir enn rett og rimeleg at det til slutt skulle lykkast for ein frå Røldal å nå heil til topps. Eg håpar at du er den fyrste av fleire, sa Ekkje.