Fylkesrådmann Paul M. Nilsen tillet likevel riving av kalkomnar på smelteverkstomta, men det er berre dersom SNU oppfyller visse krav.

- Så lenge rivinga blir gjort på ein skånsam måte, og rivinga ikkje skadar bygningar som ligg i nærleiken og som skal vernast, kan SNU rive kalkomnane, seier fylkesrådmann Paul M. Nilsen til HF.

Ordførar John Opdal (H) har heilt sidan den for han overraskande beskjeden om rivingsnekt kom, jobba med å få fylket til å sjå på saka på nytt.

I ettermiddag (fredag) kom beskjeden frå fylkesrådmannen.

Opdal er glad

- Eg vil oppfylla dei lovleg fatta vedtaka som Odda kommune har gjort i denne saka og som vi har fått støtte for frå Fylkesmannen, seier Opdal.

Han er glad og letta over at fylket er villige til å gå i dialog med SNU og Odda kommune.

Vedtaket om å ikkje tillate riving av kalkomnar, vart av Opdal oppfatta som ein omkamp.

Møte på måndag

Det som står igjen før rivinga kan endeleg godkjennast, er å sjå på grensesnittet mellom kalkomnane og skalltaket. Bygningskroppane heng fysisk saman og det er viktig å ikkje rive sånn at ein øydelegg skalltaket.

På måndag skal SNU ved Karstein Bremnes, ordførar Opdal og fylkesrådmannen ha møte i Bergen der grensesnittet, riving på ein skånsam måte og avbøtande tiltak er tema.

- Haldninga er at vi skal finna ei løysing, seier fylkesrådmann Paul M. Nilsen til HF.

Delte reaksjonar

Dei borgerlege partia i Odda kommune var samla til gruppemøte, då ordførar Opdal delte nyheiten frå fylkesrådmannen.

Reaksjonane var delte, også innanfor eige parti.

Karstein Bremnes, styreleiar i SNU, har sendt inne inn ein formell klage på det forvaltningsvedtaket som sa at kalkomnane ikkje kan rivast.

- Eg vil vurdera å trekke denne klagen dersom vi på måndag kjem fram til ei fornuftig løysing.

Bremnes ventar med å jubla til han reint skriftleg og formelt har eit nytt vedtak på bordet.