Komande helg er det klart for det tredje Vøringfossrace i Eidfjord. Begge fjorårsvinnarane, May Britt Buer og Thomas Andersen er mellom dei rundt tretti som har meldt seg i konkurranseklassen.

Kort fortalt er dette eit løp som går opp tre dalar i løpet av tre dagar. Fredag går starten på Måbøgarden. Etter nesten seks kilometer med 500 meters stigning, kjem deltakarane i mål ved Fossli Hotell. Dette er også målgang for dei to neste løpa.

Laurdag startar dei ved Sima Kraftstasjon. Dette løpet er 14,5 kilometer og løparane må heilt opp i 1180 meter over havet, før det går nedover gjennom Isdalen til mål.

Obligatorisk sekk

Siste dag, sundag, går starten ved natursenteret i Øvre Eidfjord. Dette er også det lengste av dei tre løpa, 22,5 km opp Hjølmadalen, Beradalen over Hadle. Medan trimmarane kan velja om dei vil spring eitt, to eller tre løp, må konkurransedeltakarane fossa seg gjennom alle tre. Dei får også kontrollert sekk og innhald, som må vega minst 2,5 kg.

Sjefarrangør i Xtreme Endurance Eidfjord, Kari Varberg Øydvin ynskjer flest mogeleg med på løpet. Men ho oppmodar samstundes dei som ikkje skal springa til å vera med i heiagjengen langs løypene og i målområdet. Ynskjet er å gjera Eidfjord til den beste heiabygda i landet.

Tredagarsløpet Vøringfossrace tilsvarar om lag ein marathon i lengde - med til saman 3000 meter stigning og 400 ned.