-Tanken bak det nye tibodet var å imøtekoma ynskje frå mange fjellfarar, seier Jan Tyssebotn på Sandhaug turisthytte. Det var han som fekk ideen. I utgangspunktet vurderte han å starta ei rute sjølv.

Til Sandhaug

Men etter at han drøfta det med kollega Hans Olav Lægreid på Rauhelleren turisthytte, enda det opp med eit spleiselag.

- Den nye minibussruta korresponderer med Geilobussen frå og til Odda, seier Tyssebotn til HF-nett. Han har to avgangar kvar veg kvar dag bortsett frå laurdag. Frå 16. august til 5. september er det ein avgang kvar veg fredag og sundag.

Bilen vert køyrd av Steinar Ørjansen frå Geilo. På mobiltelefon frå høgda rett heimom Tinnhølen fortel han at det var tre passasjerar frå Ullensvang med på den fyrste turen. Dei skulle til Sandhaug.

Mange spørsmål

Sjølv har han hatt fleire telefonar dagleg den siste veka, med spørsmål i samband med bussruta. I pausane mellom dei to daglege avgangane kvar veg, kan han tingast for ekstratur. Mellom anna har han fått spørsmål om å henta folk som ville parkera bilen sin på Halne. Dei ville så starta fjellturen frå Tinnhølen og koma attende med Halnekongen nokre dagar seinare.

Fordelen med det nye tilbodet er at ein slepp setja att eller plassera bilen sin på Tinnhølen når ein skal ha seg ein fjelltur med start eller heimkost her.

Spleiselag

I utgangspunktet reknar ein ikkje med at det vert nokon stor butikk. For å få det til å gå saman økonomisk, er fleire instansar med på spleiselaget.

Det gjeld Eidfjord Utvikling, DNT Oslo og Omegn, Drammens og Oplands Turistforening, Bergen Turlag og turisthyttene Besso, Litlos, Rauhelleren og Sandhaug.

Jan Tyssebotn melder elles om tidleg sommar i fjellet. Det er lite snø og bekker og elvar er små og bruer er utlagde for sesongen.