Med 17 mot fire røyster, vedtok heradsstyrepolitikarane i Ullensvang måndag å legge ned Sekse skule frå skuleået 2013/14. Elevane frå krinsen vert overførte til Opedal skule på Lofthus.

Det har vore mykje fram og tilbake, og mange sterke kjensler undervegs. «Den gode skulen» har drukna i dårleg økonomi og sparetiltak.

– Vår oppgave i dag er å skjære igjennom, gjera eit vedtak og legge debatten død og lage ein god skule ut i fra vedtaket, sa Geir Midtun (H) som mente det er trong for to skular på kvar fjordside for å få logistikken til å gå opp. Han hadde tvilt seg fram til standpunktet og heldt på rådmannen sitt opphavlege framlegg om å slå saman Sekse og Opedal på Lofthus. I tillegg ville han at SFO held fram på Sekse og at skulebygget vert nytta til fritidstiltak og arrangement som idag.

– Eg slits mellom å vera skulemenneske og bygdemenneske, sa Kåre Grønsnes (SV). Og var ikkje åleine om det.

Terje Bleie (H) skulle gjerne sett resultat av byggjefelt i Sekse-krinsen før skulenedlegging.

- Kvifor ikkje la Sekse-krinsen vise at de kan få fleire innbyggjarar og elevar, og ta saka opp

att om 15 år og sjå om dei har klart det? spurte Sverre Kleivås (V).

Ordførar Solfrid Borge roste både engasjement og argumentasjon i skulestrukturdebatten.

– Det er både ei belastning og ei utfordring å konkludera. Det er mykje kjensler involvert, sa ho.

Då politikarane skulle røyste låg det to framlegg på bordet, og eitt som vart trekt; Sp-framlegget om å greie ut samanslåing av Opedal og Kinsarvik skule, og la Sekse halde fram. Det fekk fleirtal i formannskapet -og ei einsleg røyst i heradsstyret; Anders Djønne (V).

Guro Kvammen Lian (Krf) fekk seks med seg (Ulriksen, Kleivkås og Moss fra Venstre, Bleie (H) og Grønsnes (SV)) i å oppretthalda status quo.

Dermed var det duka for Geir Midtun sitt framlegg. 17 røysta for, fire imot: Venstre-representane Ulriksen, Kleivkås, Moss og Djønne.