Ein skal høyre mykje før øyro fell av. Laurdag 12. mai er det best med proppar eller øyreklokker om ein tek turen til Simadalen.

Der skipar Eidfjord CSC (Cider & Sykle Club) til sykkelskyttarmeisterskap.

Det er syklistane i IL Harding som er spesielt utfordra i den noko utradisjonelle idrettsgreina, som CSC`arane har von om skal vekse seg sterk og stor.

– Me ser gjerne at fleire melder seg på - og at dei utfordrar naboar, arbeidskolleger, vener eller ein i syforeininga, seier Frede Olaussen, munter presseansvarleg i Eidfjord CSC.

Han viser til at klubben, som tenkjer både klokt og langsiktig, no samarabeider med Hardanger Active, som tilbyr aktivitetar for borna medan dei vaksne syklar og skyt.

– Det er førebels eit lite meisterskap, men me har von om masse publikum med flagg og heiarop på standplass, seier han.

Harding har varsla at dei er klare til å ta kampen opp mot sykkelskytarane i Eidfjord. Oppladinga har vore i full gang, både mentalt og fysisk, over lengre tid.

Olaussen oppmodar folk om å stryke 17.mai-flagget, sette proppar i øyrene og ta med heile famlien til Simadalen for å lage fest i samband med meisterskapen, som har fått kjærkomen økonomisk stønad frå lokale støttespelarar.

Folk har ei veke på seg -både til å stryke flagg og til å finne sykkel- og skyteformen.

12. mai er dagen. Simadalen i Eidfjord er staden.