Hjelpekorpsa i HFs dekningsområde har hatt vakt heile påskeveka, frå palmehelga til og med søndag eller måndag, bortsett frå Kinsarvik Røde Kors som ikkje hadde vakt denne påsken.

Fallskader i Odda

Palmelaurdag, tysdagen i påskeveka, langfredag og påskeaftan var Odda Røde Kors ute på ambulanseoppdrag med snøskuter. Fire personar vart transportert frå fjellheimen og fram til ventande ambulansebil.

- Det var stort sett skade i bein og rygg etter fall på det harde føret, fortel operativ leiar i Odda Røde Kors, Sverre Molven.

Korpset fekk skryt for rask utrykking og skånsam transport tilbake til veg og er glade for dei positive tilbakemeldingane.

Roleg i Eidfjord

Korpsleiar i Eidfjord, Britt Mari Riber melder om berre småskader i samband med sanitetsvakter dei har hatt i skitrekket på Maurset.

Skisenteret hadde siste opningsdag denne sesongen på søndag. Elles har ikkje korpset frå Eidfjord hatt andre oppdrag eller leiteaksjonar.

• Måndag 2.april stupte ein mann i ein bekk i alpinanlegget på Maurset, det resulterte i ein alvorleg skade

Henta pasient i Hellesvass

Røldal Røde Kors henta ein pasient med lettare skade frå Hellesvassbu påskeaftan.

Korpset har hatt folk i Hellesvass stort sett heile påsken.

- Ein person fekk behandling etter å ha pådratt seg gnagsår og ein annan fekk støtta opp ein vond akilles, fortel operativ leiar Roger Lyghamar.

Mindre folk enn vanleg på Topp

Tyssedal Røde Kors Hjelpekorps har hatt vakt i Skjeggedal frå palmehelga til og med andre påskedag, med eit snitt på fire personar på vakt.

Operativ leiar, Cato Iversen, melder om ein stille og roleg påske med litt mindre folk på Topp enn vanleg, heilt sikkert fordi Trallebanen ikkje er i drift lenger.