Kulturprisen i Odda for året 2009 vart delt ut under Odda Musikklag sin konsertkveld i kinosalen laurdag 20. februar.

Prisen gjekk til Blueslaget Lokst Utøve. Leiar i laget, Tone Mannsåker, fekk prisen overlevert av leiar i Driftskommiteen i Odda kommune, Nils P. Freim (H). Prisen er på 10 000 kroner, og eit kunsthandverk laga av Torkjell Stana. Det symboliserer fjell, fonn, foss, fjord og kraft.

Hjelpevillige
Freim drog fram at Blueslaget er ein god ambassadør for Odda, og at dei ikkje berre gjennom dei årvisse bluesarrangementa har give Odda eit løft på kulturfronten, men også gjennom å vere så villige til å hjelpe til i andre arrangement har dei bidrege til å styrke kulturlivet i Odda på ein framifrå måte.

Tone Mannsåker takka kommunen, sponsorar og samarbeidspartar, og ikkje minst alle dei som er med i Blueslaget. Ho takka også publikum og la med eit smil til at alle var velkomne på kveldens blueskonsert på hardanger Hotell. Ho fekk munter respons hjå dei som var møtte fram i kinosalen denne laurdagskvelden.

Velsmurt maskin
Frå scena bad Mannsåker om at ein av dei mest sentrale og trufaste personane i Blueslaget, Stein Egil Legård, måtte kome på scena. Han kom medan publikum klappa han opp, og fekk også eit høve til å takke for prisen.

Mannsåker la til at ho ville nytte høvet til å skryte av laget. Ho meinte ho kunne ta seg lov til det.

- Eg har jo kome seint inn i laget sitt snart 17 år gamle liv, sa ho, og takka mest av alt alle i laget for den gode innsatsen. Ho omtala mellom anna laget som "ein velsmurt maskin", der "folk veit kva dei skal gjere".

Applausen i salen tyder på at kommunen har valt ein god kandidat til prisen i år også.