Til oppsettjinga ”An Irish Celebration” hadde ikkje dei to kora berre slege seg saman, dei hadde og fått med seg fire dyktige musikarar frå distriktet.

Silje Hveem på fløyte, Annlaug Børsheim på fele, Rannveig Djønne på toradar og munnspel og Erlend Styve på gitar er alle røynde og dyktige utøvarar som er busett i Hardanger og Voss.

- Dei speler som ein vulkan, sa Magnus Opedal, dirigent for Chorus-80, med ei tidsriktig samanlikning.

Kombinasjonen kor og musikarar gav forestellinga eit stort lyft. Vekslinga mellom reine musikkinnslag, korsong, mindre songgrupper og solistar var særs vellukka.

Koret skapte og ekstra liv med små kostymeeffektar, dans, og dramatiseringar.

Mellom anna kom Molly Malone, frå den kjende visa, gåande gjennom salen med ei kjerre med muslingar og skjel. Ho døyr i løpet av songen, men dykkar opp som gjenferd-dokke i bakre rekke.

Godt frammøte

At forventningane til kvelden var høge synte seg ved det gode frammøtet. Allereie ei halvtime før konsertstart tok folk til å strøyme mot Krossvoll, og ti minutt før oppsett tid var salen nesten full.

Og folket vart ikkje skuffa då koret gjekk på scenen til tonar frå musikarane. Blant publikum byrja føtene å trampe alt frå fyrste takt.

- Her stod opplevingane i kø, det er nesten så eg kunne tenkt meg å følgje etter dei vidare til Eidfjord og Granvin, sa Ullensvang-ordførar Solfrid Borge, som var ei av dei nøgde tilhørarane.

Mange sjangrar

Under hovudtemaet irsk musikk var det mange undersjangrar representerte. Det var salmar, barnesongar, folkeviser og nyare songar. Nokre, som ”Danny Boy” og ekstranummeret ”The Wild Rover” var nok kjende for dei fleste, medan andre vakre songar var gledelege nye kjennskap.

På programmet var mellom anna barnesongen I’ll tell me Ma ( Eg seier det til mamma), med solist Sissel Berit Opheim med raud parykk og slikkepinne. Salmen ”Deg å få skåde” har Sissel Kyrkjebø gjort kjend og kjær i Noreg. Danny Boy er ”ein skikkelig irsk sviske”, som Opedal sa i sin introduksjon.

Det hadde og snike seg inn eit par songar som ikkje var irske, som den engelske folketona Scarborough Fair, som Simon and Garfunkel gjorde kjend på 60-talet. Her var Marianne Opacic solist med sjølvlaga kjole.

Det var til og med to stykke med som er komponert av to av musikarane, ”The Lounge Bar” av Annlaug Børsheim og ”Besse Vikingson” av Rannveig Djønne.

Historie

Kora hadde heller ikkje gløymt dei store hendingane i irsk historie. ”The Fields of Athenry” handlar om sveltkatastrofen på 1800-talet, medan ”The Town I loved so well” skildrar borgarkrigen i den nord-irske byen Derry. Her var Øyvind Salbu solist.

Det var tydeleg av utøvarane har øvd vel og lenge. Dei kunne songane godt, og torde å sleppe seg litt laus med kroppsrørsler og andletsuttrykk.

Alt i alt serverte jubileumskora ei stemningsfull musikalsk oppleving.