I vinter har Marit Eikemo og Frode Grytten invitert til små litteraturtreff, mens dei ventar på å få starta litteraturhuset Bokbadet. Torsdag er siste arrangementet i rekkja.

”Hordaskaldane Lars Ove Seljestad og Erlend O. Nødtvedt vil gå kvarandre i stemne med norrøn-inspirert lyrikk”, skriv Litteratursymposiet på sine heimesider.

I tillegg kjem den prisløna novellisten og romanforfattaren Annette Mattsson frå Bergen. ”Mattsson debuterte med novellesamlinga ”Fotografiet” i 1997, og har sidan skrive både romanar, novellesamlingar og barnebøker.” står det på heimesidene.

Videre skriv arrangørane:

”Erlend O. Nødtvedt frå Bergen debuterte i 2008 med diktsamlinga ”Harudes”, og same år fekk han Ung Poesi-prisen under Ulvik Poesifestival. ”Harudes” inneheld svært musikalske og dynamiske dikt, der vestlandsnatur og diktoppsett fell saman, til dømes fossefall og ((j)ord)ras).

Lars Ove Seljestad frå Odda brakdebuterte med romanen ”Blind” i 2005. I 2007 kom ”Bastard”, eit essay om klassereise. I 2009 kom romanen ”Frægd”, som er det norrøne ordet for ære. I denne romanen møter vi tre generasjonar menn frå ættegarden Hovland i Hardanger.

Siri Dyvik er lege og tradisjonsspelemann frå Hardanger, fødd og oppvaksen i Odda, busett i Haugesund. Dyvik begynte i lære hos Olav Kvammen og har seinare gått i lære hos Lars Velure, Anders Kjerland og Håvard Kvanndal. I 2005 gav ho ut cd-en ”So va da gjort”. ”