Fredag kveld startar Blømingsfestivalen på Hardangertun. Då vert det spel, dans og sosialt samver, fortel festivalgeneral Harald Bu.

I alt skal 190 musikarar fordelt på 24 orkester, kjempa om å verta dei beste på Vestlandet.

Mellom dei er det to lokale grpper med i år. Noko det ikkje har vore på mange år. Dei to er tidlegare Vestlands- og NM-vinnar Heidruns Gamaldansorkester, med Heidrun Opedal, Harald Opedal, Johannes Holven og Knut Vidar Dale, supplert med Anita Bråvoll. Gruppa har kalla seg for «Trøndhar». Det skuldast at ein også har fått med seg John Ole Morken og Lajla Buer Storli.

Harald Opedal og Anita Bråvoll er også med i den andre lokale gruppa - «Retta Draget». I tillegg finn me her Ottar Rykke, Irene Instanes, Arne Søylen, Astrid Vintertun Tjoflot, Egil Urheim og Elin Skår.

- 24 deltakande grupper er litt under fjoråret, men meir enn nok til å skapa stemning, seier Harald Bu. Festivalen startar med kosekveld fredag. Då verta det dans og sosialt samver på Hardangertun.

Sjølv konkurranse vert også avvikla her om laurdag føremiddag. Her får orkestera fyrst høve til lydprøve. Det vil seia at dei spelar ein melodi som ikkje tel.

Dei fem beste går til finalen laurdag kveld, der det også vert premieutdeling og stordans.