Før jul i fjor starta det med små drypp på framsida til hardanger-folkeblad.no. Folk vart oppmoda om å sjekka kulturkalenderen og verta med i noko som heitte Hardangerfolk . Bak skjermen i HF-hovudkvarteret sat ein spent nettredaktør og venta på respons.

- Hardangerfolk skal vera eit verktøy for lesarane våre, ein stad der hardingane kan møtast og snakka saman, seier konstituert nettredaktør i Hardanger Folkeblad, Herdis Moldøen .

Hardangerfolk.no er ei lokalavissone av nettforumet Origo.no. Her skal hardingane boltra seg i debatt, ein brukarstyrt aktivitetskalender, bloggar og deling av bilete.

Meiningsmangfald

Moldøen trur dette er noko som vert positivt for hardingane.

- Me veit at folk i regionen har mange meiningar. På hardangerfolk.no vert det lett å lufta meiningane sine, og skapa ein konstruktiv debatt.

I skrivande stund har sona 76 medlemmer, og fleire skal det bli, trur Moldøen. Ho har merka seg at mange er inne på sida og snusar på innhaldet, og oppmodar fleire om å delta. Om ein vil kommentera ei sak skriven på HF sine nettsider, må ein melda seg inn først.

Snilt samfunn

- Fleire slike debattar vert ofte prega av eit heller lågt nivå og gjerne sjikane og rasisme. Korleis skal ein unngå det?

- På origo og hardangerfolk må alle registrera seg med fullt navn. Slik må folk stå for det dei ytrar, og ei slik registrering vil nok verka positivt for debatten, svarer Moldøen.

Som nevnt har Hardangerfolk ein eigen aktivitetskalender , der ein får vita kva som skjer, kven som skal delta, og kan senda tips til andre. Moldøen meiner kalenderen vil avkrefta fordommar hardingane har mot lokalsamfunnet sitt.

- Det er gjerne ei oppfatting av at det ikkje skjer noko i Indre Hardanger. Kalenderen viser derimot at det er eit stort mangfald i lokalsamfunnet. Sjølv har eg vorten merksam på fleire arrangement eg ikkje var klar over sjølv.

Betre enn Facebook

Kalenderen er også eit viktig element for organisasjonar og lag, her kan ein budbringa eigne arrangement og aktivitetar. Det er også mogeleg å starta eigne soner for laga sine. Alt no er til dømes Odda Kino, Frivillighetssentralen i Odda og Ekspedisjonen Skjenkestove representert på Hardangerfolk.

Moldøen meiner at Hardangerfolk vil verta noko heilt anna enn andre nettsamfunn som til dømes Facebook.

- Hardangerfolk vert laga av og for lokalsamfunnet vårt. I motsetning til Facebook er sonen eit mykje meir praktisk verktøy. Her vert ein ikkje plaga med meiningslause bamsar, klemmar og digitale vampyrar. Det er først og fremst eit nyttig verktøy for hardingane. Meld deg inn i dag! oppmodar Moldøen.

Kva meiner du om Hardangerfolk? Skriv di meining her!