- Dette er dugnadsånd på sitt beste, seier Terje Kollbotn og representerer Norsk Folkehjelp, etter at han har teke imot deira tredjepart av i alt 124 485 kroner som kom inn i samband med støttekonserten «Odda for Haiti».

Overrekkinga skjedde utanfor soknehuset i Odda onsdag ettermiddag.

Kvar sin sjekk

Frå initiativtakarane møtte Inge Lægreid, Positivgjengen og Stein Egil Legård, Blueslaget, medan Halvard T. Eriksen, Live Pro og Gunn Gravdal Elton, ikkje hadde høve å vera med.

Målet før konserten, var å samla inn 100 000. Difor var det ein svært glad og nøgd duo som overrekte ein felles symbolsk storsjekk og tre mindre sjekkar til kvar av mottakarane. I tillegg til Kollbotn, var det Morten Miljeteig frå Odda Røde Kors og soneprest Lars Bernhard Ølberg og diakon Annlaug Halvorsen Engmark på vegne av Kirkens Nødhjelp.

Kritisk fase

Konserten med 432 betalande resulterte i 54 000 kroner i billettinntekter. Dei resterande 70 000 kom inn som innmelde gåver under konserten, pengar direkte i ei bøsse som vart send rundt i salen og milde gåver i ettertid, seier Inge Lægreid til HF.

Pengane skal gå uavkorta til det arbeidet Norsk Folkehjelp, Kirkens Nødhjelp og Røde Kors gjer på Haiti. Der er ein no inne i ein kritisk fase, for no byrjar regntida.

Fasteaksjon

- Trongen for hjelp vil vera stor framleis. Me må ikkje slutta med å støtta, men heller la dette vera ein vekkjar og starten på å gje meir hjelp, vart det sagt. Inge Lægreid presiserer at ein då må bruka andre kanalar fordi dei har stengt kontoen som vart oppretta til støttekonserten.

Kyrkja sine representantar minner mellom anna om den nært føreståande Fasteaksjonen, som i år skal gå til tiltak i tilknyting til klimaendringar.