”Han Jakob åtte eit sers lag til å vinna folk kvar han for. Han var no fyrst og fremst ein stø og setande mann med tillit hjå alle, og so var han so vensæl og finsleg og folkeleg i omgjenge. Han var no og jamt seg sjølv, både ute og heime. Ein høyrde aldri han brøytte målet, sa ein av gratulantane, Sjur J. Sekse, og siterte noko bestefar til Jakob hadde sagt om han til Halldor O. Opedal.

Orda dekkar mykje av det æresgjesten stod og står for.

-Dette skulle ha vore gjort for lenge sidan, sa Kari Bjørkavoll Eitrheim som ynskte heidersgjesten, familie, venner og andre velkomne til bords på Utne onsdag kveld.

Her møtte dei eldste jentene i barnekoret opp under leiing av Inger Elisabeth Aarvik som hylla jubilanten med to songar. Ordførar Solfrid Borge stod for den offisielle overrekkinga.

-Mange har i dag grunn til å takka deg for din store innsats, spesielt i nærmiljøet. Ein omtykt mann i bygda. Du har oppfylt kritera i statuttane og det er ei ære for meg å få dekorera deg med H. M. Kongens fortenstmedalje i sylv, sa ho før ho festa medalja på jakkekragen og deretter overrekte medfylgjande skriv, signert kong Harald, der han inviterte Jakob og kona Halldis til slottet.

Heilt sidan ungdomstida har Jakob T. Alvsåker teke på seg mange frivillige og kommunale verv. Alt tidleg i ungdomen tok han til med lagsarbeid. Han var speidar og troppsleiar i mange år, aktiv i fråhaldslosjen og hadde mange verv både lokalt og i distriktslosjen.

Under middagen vart det helsa frå både grannalag og dei organisasjonane han har gjort ein stor innsats i. Jakob har hatt ei rekkje verv både politisk og i private lag og ordgnisasjonar.

Jakob T. Alvsåker har skrive mykje interessant om alt frå jaktefart og frukthandel til soga om Utne kyrkje og Ullensvang Kristeleg Folkeparti, der han også er æresmedlem.

Leiaren i Vines Bygdalag, Sjur Reinsnos gratulerte også, og takka Kari Bjørkavoll Eitrheim for at ho hadde gjort opptakten til medalja og saman med ordføraren hadde arbeidd fram ein solid underbygd søknad.

Heidersgjesten sjølv takka audmjukt og gav på ein lun og fin måte, nokre smakebitar av livet og verksemda si.

Sjur Sekse avslutta med å takka for ein utmerka middag, der han elles summerte opp mykje av det Jakob T. Alvsåker har stått og framleis står for:

-Du representerer dei såkalla motkulturane kristendom, norskdom og fråhald. Eg vel å kalla dei høgkulturar.